• catholic.ge
  • YouTube - კანალი
  • კათოლიკური ეკლესია

ლოცვა ქრისტიანთა ერთობისათვის - 2022

Updated: Jan 21

18-25 იანვარს, ქრისტიანთა ერთობისათვის ლოცვის კვირეული აღევლინება. ამ პერიოდში სხვადასხვა დენომინაციის ქრისიტიანები ერთიანდებიან და ეკუმენურ ლოცვას აღავლენენ.


ფოტო: ევანგელურ–ბაპტისტური ეკლესია / ეკუმენური ლოცვა 2020

2022 წლის თემა მათეს სახარებას ეფუძნება: "ვინაიდან ვიხილეთ მისი ვარსკვლავი აღმოსავლეთში და მოვედით, რათა თაყვანი ვცეთ მას". (მათ. 2:1-12)


ისტორია


ტრადიციულად, ქრისტიანთა ერთობისათვის ლოცვა იანვრის ბოლო კვირას აღევლინება. კვირეულის ფარგლებში, სხვადასხვა ქვეყანაში ქრისტიანული საკრებულოები ერთობლივად აღავლენენ ლოცვას, რათა მათ შორის მშვიდობა და ერთიანობა სუფევდეს.


ამ ტრადიციას, მთელს მსოფლიოში 100 წელზე მეტი ხნის ისტორია აქვს და იგი სათავეს იღებს გასული საუკუნის დასაწყისში, ფრანცისკანელი მღვდლის ინიციატივიდან.


მოგვიანებით მსოფლიო ეკლესიათა საბჭომ (World Council of Churches ) ეს მოწადინება საყოველთაო გახადა და ყოველ წელს იანვრის ბოლოს იმართება ქრისტიანთა ერთობისათვის ლოცვის კვირეული.


ეს კვირეული ერთგვარად ეხმაურება იესოს სურვილს: „რათა ყველანი ერთი იყვნენ“ (იოან.17.21).


კვირეული საქართველოში


ორ ათეულ წელზე მეტია, რაც ასეთ ეკუმენურ ლოცვას უერთდებიან საქართველოში არსებული ქრისტიანული გაერთიანებები.


კვირეულის განმავლობაში, კონფესიების სასულიერო პირები და მრევლი ერთად ლოცულობს. ასეთ ლოცვას საქართველოში მხოლოდ ოთხი ეკლესია უერთდება: კათოლიკე ეკლესია, სომეხთა სამოციქულო მართლმადიდებელი ეკლესია, ევანგელურ-ლუთერული და ევანგელურ-ბაპტისტური ეკლესიები.


ტრადიციის მიხედვით, ყოველ წელს ამ ოთხიდან ერთ-ერთი ეკლესია არის ეკუმენური ლოცვის მასპინძელი.


გასულ წელს, ეკუმენური ლოცვის მასპინძელი იყო ევანგელურ-ლუთერული ეკლესია, 2022 წელს კი სომხურ სამოციქულო ეკლესია იქნება.


21 იანვარს, 16.00 სთ-ზე, სომხურ სამოციქულო ეკლესიაში, სურბ გევორქის საკათედრო ტაძარში (მეიდანზე) ეკუმენური ლოცვა გაიმართება .


თაკო ფეიქრიშვილი