2 აგვისტო - განსაკუთრებული მადლის მიღების დღე
- 2 days ago
- 2 min read
2026 წელს, ეკლესია და ფრანცისკანული ოჯახი განსაკუთრებულ საიუბილეო თარიღს აღნიშნავენ. ეს არის წმინდა ფრანცისკე ასიზელის გარდაცვალების („ტრანზიტის“) 800 წლისთავი.
წმინდა ფრანცისკე 1226 წლის 3 ოქტომბერს გადავიდა მარადიულ სიცოცხლეში. რვა საუკუნის შემდეგაც კი „ასიზელი ღარიბის“ (Poverello) სული კვლავ მიმართავს მსოფლიოს და გვახსენებს, რომ სახარების გული ღვთის უსაზღვრო სიყვარულია, რომელიც მის წყალობაში ვლინდება.
წმინდა ფრანცისკე ღვთის მადლის დიდი მოყვარული და შერიგების დაუღალავი მქადაგებელი იყო. სწორედ მისი წყალობით ეკლესიამ მიიღო "პორციუნკულას ინდულგენციის" უნიკალური მადლი, რომელიც ფართოდ არის ცნობილი როგორც „ასიზის მიტევება“. ეს ინდულგენცია პაპმა ჰონორიუს III-მ მიანიჭა და იგი ყოველწლიურად, 2 აგვისტოს, საზეიმოდ აღინიშნება. ეს დღე, თავისი საიუბილეო მადლით, მორწმუნეთათვის ღია კარია, რათა განიცადონ ზეციერი მამის მიმტევებელი სიყვარული.
წმინდა ფრანცისკეს მარადიულ ცხოვრებაში გადასვლის 800 წლის იუბილესთან დაკავშირებით, ეკლესია კვლავ გვთავაზობს ამ განსაკუთრებულ მადლს და მორწმუნეებს აძლევს შესაძლებლობას მიიღონ სრული ინდულგენცია, ჩვეულებრივი პირობების შესრულებით:
– აღსარება (ღვთის მადლის მიღებისთვის);
– წმინდა ზიარების მიღება;
– ლოცვა წმინდა მამის განზრახვებისთვის ("მამაო ჩვენო" და "მრწამსი", ან სხვა შესაბამისი ლოცვები);
– ფრანცისკანული ეკლესიის ან სპეციალურად განსაზღვრული საიუბილეო ტაძრის მონახულება, სადაც უნდა ილოცონ "მრწამსი" და "მამაო ჩვენო".
როგორც წმინდა ფრანცისკე თავის ანდერძში წერს: „მას შემდეგ, რაც უფალმა ძმები მომცა, არავის უსწავლებია, რა უნდა გამეკეთებინა; თავად უზენაესმა გამომიცხადა, რომ წმინდა სახარების მიხედვით უნდა მეცხოვრა.“
წმინდა ფრანცისკე კარგად აცნობიერებდა, რომ ყოველი სულიერი განახლება იწყება ადამიანის გულიდან იმ თავმდაბლობით, რომლითაც იგი ღვთის წინაშე საკუთარ სისუსტეს აღიარებს. შერიგების საიდუმლო არ არის განსჯის სასამართლო; იგი არის შეხვედრა ღვთაებრივ მკურნალთან, რომელიც კურნავს ჩვენს სულიერ ჭრილობებს და სულს მშვიდობას უბრუნებს.
2026 წელი, როდესაც წმინდა ფრანცისკეს გარდაცვალების 800 წლისთავს აღვნიშნავთ, თითოეული ჩვენგანისთვის სიყვარულით გადაცემული მოწვევაა – მივუახლოვდეთ აღსარების საიდუმლოს. წარსულის ტვირთის, ცოდვებისა და დანაშაულის განცდის დატოვება შესაძლებელია მაშინ, როდესაც ღვთის მადლს გავუხსნით გულს.
ამ იუბილესთან დაკავშირებული სრული ინდულგენცია კიდევ ერთხელ გვახსენებს, რომ ღვთის მოწყალებას საზღვარი არ აქვს და ზეცა ხარობს ყოველი ადამიანის დაბრუნებით, ვინც გადაწყვეტს თავიდან დაიწყოს.
ნუ გაუშვებ ხელიდან ამ მადლის წელს!
მიდი აღსარებაზე, შეურიგდი ღმერთს, საკუთარ თავსა და შენს მოყვასს და მიიღე ეს ძვირფასი სულიერი ნიჭი, რომელიც განაახლებს შენს ცხოვრებას და მარადიული ცხოვრებისათვის მოგამზადებს.
დაე, წმინდა ფრანცისკე ასიზელი შუამდგომლობდეს თითოეული ჩვენგანისთვის ამ მოქცევის გზაზე.
მამა ნესტორ გონსალესი,
ფრანცისკელი ბერი, ახალციხე
Comments