საქართველოში კათოლიკე ეკლესიის საეპისკოპოსო გერბი

საქართველოში კათოლიკე ეკლესიის ადმინისტრაციას თავისი საეპისკოპოსო გერბი აქვს. იგი რამდენიმე სიმბოლოს მოიცავს, მათ შორის წარწერას, სადაც იესოს ლოცვაა თავისი ეკლესიის გაერთიანებისთვის.

გერბზე დატანილი ფრაზა ლათინურია: "UT UNUM SINT", რაც ქართულად ნიშნავს „რათა ყველა ერთი იყოს“ და აღებულია იოანეს სახარებიდან, 17:21.

სწორედ ასეთი ერთიანობისთვის, ყოველი წლის 18–25 იანვარს ქრისტიანთა სხვადასხვა დენომინაცია საერთო ლოცვას აღავლენენ.

რაც შეეხება თავად საეპისკოპოსო გერბს, იგი რამდენიმე სიმბოლოს მოიცავს:

• მტრედი – გერბის ზედა ნაწილში ჯვარზე გამოსახულია მტრედი, სულიწმიდის სიმბოლო. ვინაიდან ეკლესიის ყოველი საიდუმლო სულიწმიდის ქმედებაა და თანაზიარების წყაროა.

• წმიდა ნინოს ჯვარი – შეგვახსენებს, რომ ქრისტიანობა საქართველოში ამ წმიდანის ქადაგებას უკავშირდება (მის დროს ეკლესია ერთიანი იყო).

• ხუთი ვარსკვლავი – ჩვენი ეპისკოპოსის კონგრეგაციის, სტიგმატელთა გერბის ნაწილია: ხუთი ვარსკვლავი იესოს ხუთი იარაა.

• ორი შროშანი – ჩვენი ეპისკოპოსის კონგრეგაციის, სტიგმატელთა გერბის ნაწილია: ორი შროშანი მეუღლენი: ყოვლადწმიდა მარიამი და წმ. იოსები

• ხორბალი – გერბის ქვედა ნაწილში გამოსახულია ხორბლის თავთავი, რომლის დაფქვითაც მზადდება „პური არსობისა“

• ზეთისხილი – მშვიდობის სიმბოლო, რომელიც იძლევა ზეთს, კურთხევისა და მიძღვნის ნიშანს (მირონს)

• წარწერა – "Ut unum sint" იო 17, 21, წარმოადგენს იესოს ლოცვას თავისი ეკლესიის ერთობისათვის, "რაითა ყოველნი ერთ იყვნენ"

 Catholic.ge